Et tu, Brute …!
(en waarskynlik van lank voor daai tyd ookal en ja, dis die korrekte Latynse form in die accusative en nie Brutus soos algemeen bekend nie)
Waarvan praat ek ??
Politici … werfetters van formaat. Die tipe van mense wat in hulle ouma se koekblik sal kak, hul suster aan ‘n internasionale smokkelsindikaat verpand en dit alles die oggend voor hulle vroom en vredig voor jou kom staan en beloftes maak oor hoe hulle die wereld ‘n beter plek gaan maak. Hulle is die verdorde binnebadrandring in die abbatoir se bloedaftap tenk. Fokken bliksems as jy my vra.
Nou mag mens jouself afvra hoekom ek myself so opwerk oor politici en hulle doen en late. Dis amper soos om te kerm oor jou hond ‘n slagyster op die gras gelos het – dis immers inherent aan hulle natuur en mens moet dit maar so aanvaar. (Dis byvoorbeeld een rede hoekom ek nie ‘n hond het nie.) Die vraag is egter hoeveel moet mens net as gelate aanvaar ? Waar le die grens van wat redelikerwys weg gerasionaliseer kan word en wat is net eenvoudig uitbuiting ?
As ‘n mens wat homself gewoonlik nie ophou met onbenullighede soos die doen en late van plaaslike politici nie lei ek oor die algemeen ‘n vreedsame en rustige lewe. Die naaste wat ek daaraan probeer kom om die wereld ‘n beter plek te maak is gewoonlik rondom die braaivleisvuur waar ek vir my vriende probeer verduidelik dat daar plekke in die wereld is waar mens nie elke aand met ‘n wapen onder jou kopkussing hoef te gaan slaap nie. Dis egter weer ‘n ander saak en mens sou die argument kon maak dat aangesien ek nie positief probeer bydra tot die opbou van die land nie, ek dus nie ‘n voet het om op te staan nie. Dis dan ook so, maar wat van die hordes mense wat hulle vertroue en hoop op ‘n politike party gevestig het – net om nou op die wreedste moontlike manier in die rug gesteek te word ?
Vir die wat dit nou nog nie opgetel het nie – ek praat natuurlik van die politieke oorlopery wat tans besig is om plaas te vind. (Vir ons internasionale kykers – politieke oorlopery is die tydperk wanneer individue wat in ‘n plaaslike (of nasionale) parlement of raad sit hulle tasse kan pak en van hulle huidige politieke party na ENIGE ander politieke party toe kan oorloop en sodoende hulle sitplek (verteenwoordiging) saam met hulle kan vat.) Ja.
Nevermaaind dat hulle nie in ‘n persoonlike hoodanigheid deur die kiesers gekies is nie, maar bloot deur hulle betrokke partye aangestel is.
Nevermaaind dat jy moeite gedoen het om vir ‘n spesifieke party te stem omdat jy nie met die beleid van ander partye saamstem nie.
Nevermaaind dat daar in die pers bespiegel word dat die leier van die nuwe party bande met die onderwereld het.
Nevermaaind dat daar “kontantlenings” aan raadslede gegee word indien hulle sou besluit om oor te loop.
Nevermaaind dat die leier van die nuutgestigte party ‘n hoogeplaasde lid van ‘n opposisieparty R 200 000 en ‘n aand saam met ‘n blonde, 22 jarige Russiese gesellin aangebied het.
Nevermaaind dat jy duisende mense prontuit en sonder verskoning in die hol gaan naai vir persoonlike gewin.
Nevermaaind dit. Dis hoe die stelsel op die oomblik funsioneer. Dis alles aboveboard. Alhoewel die koerante ‘n hele bol stof opskop oor die situasie is daar nie sprake van massa-protes of uitbarstings van openbare woede nie. Dit wil voorkom asof die publiek dit maar net gelate gaan aanvaar. Wat kan mens tog doen ?
Nou soos ek gese het probeer ek myself gewoonlik distansieer van die hele politieke sirkus en alles wat daarmee saamgaan en gaan dit ook nou nie ‘n verskil aan my maak as die helfte van die DA en ID lede oorloop na die een of ander New National People’s Party nie. Maar wragtag waar, om so in die openbaar voor almal te staan en te lieg en te bedrieg en mense wat hulle vertroue in jou gestel het te behandel soos ‘n hondedrol wat onder jou skoensool vassit kan ek nie gelate aanvaar nie.
Nuutste kommentaar